თბილისი, 29 ივლისი — Sputnik. საქართველოს კულტურული მემკვიდრეობის დაცვის ეროვნულმა სააგენტომ ხელოვნების ნიმუშთა კონსერვაციის ცენტრთან ერთად ამბროლაურის მუნიციპალიტეტის სოფელ ნიკორწმინდაში მდებარე წმ. ნიკოლოზის სახელობის ტაძრის რესტავრაცია-რეაბილიტაციის პირველი ეტაპი დაიწყო, იუწყება სააგენტო თავის Facebook-გვერდზე.
წმ. ნიკოლოზის სახელობის ტაძარი XI საუკუნით არის დათარიღებული და მისი მშენებლობა ბაგრატ III მეფობის ბოლო პერიოდს (1010-1014 წწ.) უკავშირდება.
ძეგლი ჯვარ-გუმბათოვანია. გარედან ჯვრის ფორმის. შიდა სივრცეს გუმბათის თორმეტი სარკმელი ანათებს. გუმბათს კონუსური გადახურვა აბოლოვებს. საკურთხევლის გვერდებზე განთავსებულია სამკვეთლო და სადიაკვნე, ხოლო დასავლეთის მკლავთან ეკვდერები. მოგვიანებით არის ნაგები ეკლესიის მინაშენები, რომელთაგან ორი — სამხრეთისა და დასავლეთის დღემდეა შემორჩენილი. ჩრდილოეთი მინაშენი დანგრეულია და მისი გეგმა ნაწილობრივ იკითხება საძირკვლის დონეზე.
ვეტერანი სამხედროები ქართულ-ბრიტანულ არქეოლოგიურ ექსპედიციაში მონაწილეობენ >>
ტაძრის რესტავრაცია-რეაბილიტაციის I ეტაპი ქვის კონსერვაციის სამუშაოებს მოიცავს. შესრულებული სამუშაოების შედეგად: გაიწმინდა ქვებს შორის ადგილები, მოხდა ნაკერების, მიკრობზარებისა და ბზარების ამოვსება, ქვის ნაწილების ფრაგმენტების გაერთიანება; ძველი ცემენტისგსან გაწმენდა და შეცვლა კირის ხსნარით, ორნამენტების კონსერვაცია.
