თბილისი, 3 ივლისი — Sputnik. საქართველოს სკოლებში ბოლო სასწავლო წლის განმავლობაში 96 ათასი სერიოზული დისციპლინარული დარღვევა დაფიქსირდა, როგორიცაა ვანდალიზმი, ჩხუბი, აკრძალული საგნების ტარება და შენახვა, განაცხადა საქართველოს განათლებისა და მეცნიერების მინისტრის მოადგილემ ლია გიგაურმა პარლამენტში.
აგრესია სკოლის მოსწავლეებს შორის ბოლო დროს ერთ-ერთი მთავარი გამოწვევა გახდა საქართველოში. ხორავას ქუჩაზე მოზარდების სისხლიანი დაპირისპირების შემდეგ, რომლის დროსაც ორი მოსწავლე მოკლეს, განათლებისა და მეცნიერების სამინისტრო სკოლის შენობებსა და პერიმეტრს ყურადღებით ადევნებს თვალს.
2017-2018 წასწავლო წელს დაფიქსირდა 1,7 ათასზე მეტი ჩხუბი და 1,2 ათასზე მეტი შემთხვევა აკრძალული ნივთების, მათ შორის ალკოჰოლის, პიროტექნიკის, სანთებელების, ელექტროშოკერებისა და სიგარეტის შენახვისა. ასევე იყო დანები, კასტეტები, პნევმატური იარაღი, ბასრი საგნები — 94-ზე მეტი შემთხვევა.
მინისტრის მოადგილემ ცალკე აღნიშნა სკოლებში 14-წლამდელთა შორის გავრცელებული დარღვევები.
„ცალკე გამოვყავით დარღვევები, რომლებიც 14 წლამდე მოზარდებში გამოიკვეთა და ესენია — აზარტული თამაშები (და ეს ეხება როგორც კომპიუტერულ თამაშებს, ასევე ბანქოს), ასევე გამოიკვეთა აკრძალული ნივთების ფლობა, ალკოჰოლის მოხმარების მცდელობები და თამბაქოს მოხმარება, დაფიქსირდა რამდენიმე შემთხვევა თანხის შეგროვების, იყო ასევე მოსწავლეთა შორის ფიზიკური და სიტყვიერი შეურაცხყოფა, სავარაუდო ნარკოტიკული საშუალების მოხმარების 1-2 შემთხვევაც", — განაცხადა გიგაურმა პარლამენტის განათლების კომიტეტის სხდომაზე სიტყვით გამოსვლისას.
მან აღნიშნა, რომ ეს ფაქტები სკოლის პერიმეტრის შიგნით, ან სკოლის ეზოშია დაფიქსირებული.
ქვეყნის ახალმა პრემიერ-მინისტრმა მამუკა ბახტაძემ უკვე დააანონსა განათლების სისტემის რეფორმა. მთავრობის გეგმების თანახმად, სასწავლო დაწესებულებების მუშაობა მიმართული უნდა იყოს მოსწავლეების შემოქმედებითი, ტექნოლოგიური და შრომითი უნარების განვითარებაზე, ჯანსაღი ცხოვრების წესის პოპულარიზებაზე და თვითრეალიზების შესაძლებლობების წარმოდგენაზე.
