თბილისი, 14 ივნისი — Sputnik. საქართველოს ფეხბურთის ნაკრების თავდამსხმელი ლევან მჭედლიძე „ემპოლისთან“ კონტრაქტს ერთი წლით გააგრძელებს, იუწყება იტალიური გამოცემა Il Tirreno.
იტალიურ კლუბსა და ქართველ ფორვარდს შორის შეთანხმებას ვადა მიმდინარე წლის 30 ივნისს ეწურება, მაგრამ „ემპოლის“ ხელმძღვანელობამ გადაწყვეტილება მიიღო 28 წლის მჭედლიძე ერთი სეზონით კიდევ დატოვოს გუნდის შემადგენლობაში.
მჭედლიძემ 2017 წლის აპრილში „მილანის“ წინააღმდეგ გამართულ მატჩში სერიოზული ტრავმა მიიღო. მას შემდეგ ფეხბურთელს არცერთი მატჩი არ ჩაუტარებია. მიუხედავად ამისა, კლუბის ხელმძღვანელობას ფეხბურთელის პოტენციალის სჯერა და მიიჩნევს, რომ მჭედლიძე შეძლებს ახალ სეზონში გუნდს დაეხმაროს.
მჭედლიძე „ემპოლის“ შემადგენლობაში 2010 წლიდანაა. ამ დროის განმავლობაში თავდამსხმელმა ყველა ტურნირზე გუნდის სახელით 151 მატჩი ჩაატარა, 20 გოლი გაიტანა და 8 შედეგიანი გადაცემა გააკეთა.
