თბილისი, 14 ივნისი — Sputnik. თბილისში, ქართველიშვილის ქუჩაზე მომხდარი მკვლელობის ბრალდებით საქართველოს შსს–ს თანამშრომლებმა 26 წლის მამაკაცი დააკავეს, ნათქვამია უწყების განცხადებაში.
მკვლელობა, რომელზეც საუბარია, თბილისში დღეს დილით მოხდა. შსს–ს ინფორმაციით, ბრალდებულმა ურთიერთშელაპარაკებისას პირს თავის არეში ლურსმნებიანი ფიცარი ჩაარტყა, რის შედეგადაც მამაკაცი ადგილზე დაიღუპა.
ტელეკომპანია Rustavi2–ის ინფორმაციით, დაღუპული 34 წლის დავით გუზიტაშვილია. მისი ცხედარი მეზობლებმა მის სახლთან ახლოს იპოვეს.
დაზიანებები მიიღო თავად მკვლელმაც, რომელიც სამართალდამცველებმა საავადმყოფოში გადაიყვანეს, საიდანაც მალე გამოწერეს. გავრცელებული ინფორმაციით, ბრალდებული იმ სახლის გარე ფასადს არემონტებდა, რომელშიც მოკლული ცხოვრობდა,
მომხდარ ფაქტზე გამოძიება განზრახ მკვლელობის მუხლით მიმდინარეობს, რაც 7–დან 15 წლამდე ვადით თავისუფლების აღკვეთას ითვალისწინებს.
