თბილისი, 3 ივნისი — Sputnik. ქობულეთი-ბათუმის ცენტრალურ მაგისტრალზე ავტოსაგზაო შემთხვევის შედეგად ორი ადამიანი დაიღუპა, ორი კი დაშავდა, იუწყება აჭარის ტელევიზია.
შემთხვევა გვიან ღამით, სოფელ ბუკნართან მოხდა.
არსებული ინფორმაციით, ერთმანეთს „გაზ 024“-ის და BMW-ს მარკის მსუბუქი ავტომობილები შეეჯახნენ. ადგილზე გარდაიცვალა ცოლ-ქმარი, რომლებიც, სავარაუდოდ, ადგილობრივები არიან. ორი დაშავებული საავადმყოფოში გადაიყვანეს.
ადგილზე სასწრაფო დახმარებისა და საპატრულო პოლიციის ეკიპაჟები იყვნენ მობილიზებული.
გამოძიება დაწყებულია სსკ-ის 279-ე მუხლის პირველი ნაწილით (ტრანსპორტის უსაფრთხოების ან ექსპლუატაციის წესის დარღვევა, რამაც გამოიწვია ერთი ან მეტი ადამიანის სიცოცხლის მოსპობა“), რაც ითვალისწინებს სამ წლამდე ვადით თავისუფლების აღკვეთას.
