თბილისი, 25 მაისი — Sputnik. ახალგაზრდა ქართველი პიანისტი, ვენის კონსერვატორიის სტიპენდიანტი მიხეილ ყანდაშვილი უკრაინის სახელმწიფო ფილარმონიაში გამოვა.
ახალგაზრდა ქართველი პიანისტი (პროფესორ თამარ აჩბას კლასი) 30 მაისს შეასრულებს პეტრე ჩაიკოვსკის I საფორტეპიანო კონცერტს. აკადემიურ სიმფონიურ ორკესტრს ტარას მარტინიკი უდირიჟორებს.
კონცერტი უკრაინა-საქართველო-ავსტრიის კულტურული თანამშრომლობის ეგიდით ტარდება. საღამოზე ასევე შესრულდება ჰაიდნის სიმფონია №103.
ჩაიკოვსკის პირველი საფორტეპიანო კონცერტი პირველად მან 14 წლის ასაკში თბილისის ეროვნულ მუსიკალურ ცენტრში შეასრულა — საქართველოს ეროვნული სიმფონიური ორკესტრის თანხლებით, რევაზ ტაკიძის დირიჟორობით.
უკვე არაერთი წელია ახალგაზრდა ხელოვანი ქართულ-ავსტრიულ საფორტეპიანო სკოლას წარმოადგენს საფრანგეთში, ავსტრიაში, გერმანიასა და ესპანეთში.
უკრაინის მუსიკალურ სივრცეში ეს მისი პირველი გამოსვლაა.
