თბილისი, 23 მაისი — Sputnik. საქართველოში ნოვოსიბირსკის ოლქიდან ხორბლის პარტია პირველად გამოაგზავნეს, იუწყება საინფორმაციო სააგენტო РИА Новости „როსსელხოზნადზორის" (რუსეთის ვეტერინარიისა და ფიტოსანიტარიის ზედამხედველობის სამსახური) რეგიონის სამმართველოზე დაყრდნობით.
სამმართველოს სპეციალისტებმა საქართველოში გამოსაგზავნი ხორბლის პარტიის ნიმუშები შეამოწმეს.
„ექსპერტიზების შედეგებით… ხორბალში საკარანტინო ორგანიზმები აღმოჩენილი არ არის. გაიცა ფიტოსანიტარული სერტიფიკატები 2,1 ათასი ტონა ხორბლის თბილისში რკინიგზით ტრანსპორტირებისთვის", — ნათქვამია განცხადებაში.
„როსსელხოზნადზორის" სამმართველოში აღნიშნეს, რომ საქართველოში ხორბლის გაგზავნა უახლოეს პერიოდში გაგრძელდება.
საქართველოს სტატისტიკის ეროვნული სამსახურის მონაცემბით, 2017 წელს რუსეთიდან იმპორტირებული იყო 97,6 მლნ აშშ დოლარის ღირებულების 512,3 ათასი ტონა მარცვლეული. რუსეთის წილი საქართველოს მარცვლეულით მომარაგებაში 98%-ია.
