თბილისი, 11 მაისი — Sputnik. საგარეჯოს რაიონის სოფელ ხაშმში ირანის მოქალაქე ალი რეიჰანი ცხელ გუდრონში ჩავარდა, იუწყება საზოგადოებრივი მაუწყებლის პირველი არხი.
გავრცელებული ინფორმაციით, 39 წლის მამაკაცი სოფელში სახლს აშენებდა. უბედური შემთხვევა სამშენებლო სამუშაოების პროცესში მოხდა.
მამაკაცი თავდაპირველად საგარეჯოს რაიონულ საავადმყოფოში მიიყვანეს, მაგრამ მდგომარეობის სირთულის გამო იგი კატასტროფის მედიცინის ბრიგადამ თბილისის დამწვრობის ცენტრში გადაიყვანა. ექიმების განცხადებით, მამაკაცს სხეულის 80% აქვს დამწვარი.
მომხდარ ფაქტზე გამოძიება საქართველოს სსკ-ის 124-ე მუხლით დაიწყო, რაც ჯანმრთელობის მძიმე დაზიანებას გულისხმობს.