თბილისი, 3 მაისი — Sputnik. 2018 წლის პირველ კვარტალში საქართველოდან შვეიცარიაში ექსპორტზე გავიდა დაუმუშავებელი ოქრო და საათები, იუწყება საზოგადოებრივი მაუწყებლის პირველი არხი ქვეყნის სტატისტიკის ეროვნულ სამსახურზე დაყრდნობით.
1 მაისიდან ძალაში შევიდა საქართველოსა და ევროპის თავისუფალი ვაჭრობის ასოციაციის (EFTA) წევრ ქვეყნებს — შვეიცარია და ლიხტენშტეინი — შორის თავისუფალი ვაჭრობის შესახებ შეთანხმება.
2018 წლის იანვრიდან მარტის ჩათვლით საქართველოდან შვეიცარიაში ძირითადად დაუმუშავებელი ან ნახევრად დამუშავებული ოქრო გადის. აღნიშნული პროდუქციის ექსპორტმა 17, 9 მილიონი აშშ დოლარი შეადგინა, რაც წინა წელთან შედარებით 18,5%-ით მეტია.
გარდა ამისა, წელს შვეიცარიაში ასევე გავიდა 439 ათასი აშშ დოლარის ღირებულების სუნამო; 309 ათასი აშშ დოლარის ღირებულების თხილი; 268 ათასი დოლარის ღირებულების საათები; 156 ათასი აშშ დოლარის ღირებულების კოსმეტიკური საშუალებები.
შვეიცარიიდან საქართველოში ძირითადად სამედიცინო პროდუქცია შემოდის. იანვარ-მარტში დაფასოებული სამკურნალო საშუალებების იმპორტმა ქვეყანაში 8,4 მილიონი აშშ დოლარი შეადგინა, რენტგენული აპარატურის – 5,9 მილიონი აშშ დოლარი, ადამიანისა და ცხოველების სისხლის ან იმუნური შრატების – 1,37 მილიონი აშშ დოლარი, აღდგენილი ან ნახმარი საბურავების – 712 ათასი აშშ დოლარი და ა.შ.
რაც შეეხება ლიხტენშტეინს, 2018 წლის იანვარ-მარტში საქართველოში 138 ათასი აშშ დოლარის ღირებულების პროდუქცია შემოვიდა, ექსპორტი კი არ განხორციელებულა.
