თბილისი, 28 აპრილი — Sputnik. უჩვეულოდ დასრულდა ახალგაზრდა ქალბატონის ვიზიტი ოტოლარინგოლოგთან ქუთაისის კლინიკაში — მის ცხვირში რამდენიმე სანტიმეტრის სიგრძის მავთული აღმოაჩინეს, ნათქვამია ყელ-ყურ-ცხვირის კლინიკა „გიდის" Facebook-გვერდზე გავრცელებულ განცხადებაში.
ახალგაზრდა ქალბატონმა მიმართა კლინიკას. ის უჩიოდა ტავის ტკივილებს, დისკომფორტს ცხვირში და სუნთქვის პრობლემებს. მისი თქმით, ის 17 წლის განმავლობაში მკურნალობდა, თუმცა უშედეგოდ.
საჭირო პროცედურების შემდეგ კლინიკის ექიმებმა აღმოაჩინეს, რომ 30 წლის პაციენტის ცხვირში მავთულია გაჭედილი, რომელიც ყველა ზემოჩამოთვლილი სიმპტომის მიზეზი ყოფილა.
მავთული ცხვირიდან ამოუღეს და ახლა პაციენტი თავს კარგად გრძნობს.
მაგრამ ის, თუ როგორ აღმოჩნდა ეს საგანი ახალგაზრდა ქალის ცხვირში, ამოუხსნელ საიდუმლოდ დარჩა.
