თბილისი, 15 აპრილი – Sputnik. დედაქალაქის მერი კახა კალაძე, მერის მოადგილესთან, ირაკლი ბენდელიანთან ერთად ვაკე-საბურთალოს რაიონში, ნინო რამიშვილის ქუჩის რეაბილიტაციის პროცესს გაეცნო, ნათქვამია თბილისის მერიის მიერ გავრცელებულ განცხადებაში.
პროექტი, რომელიც ინფრასტრუქტურის განვითარების საქალაქო სამსახურის მიერ ხორციელდება, ტროტუარებისა და ბორდიურების, ასევე, ახალი საკომუნიკაციო ჭების მოწყობას და მიწისქვეშა ქსელის მოწესრიგებას ითვალისწინებს.
თბილისის მერის განცხადებით, რამიშვილის ქუჩა ცალმხრივი გახდება და ამ მიმართულებით ტრანსპორტის საქალაქო სამსახური უკვე მუშაობს.
„ადგილზე პარალელურად იმუშავებს „ჯი-ვი-პი” და „თელასი”, რადგან კომუნიკაციები არასწორად იყო გაკეთებული. შეიცვლება განათებები, ბოძები და ბორდიურები. ტროტუარები გაფართოვდება, რადგან ქვეითად მოსიარულეებისთვის შეუძლებელი იყო თავისუფლად გადაადგილება. ვფიქრობთ, რომ ეს ქუჩა ცალმხრივი გავხადოთ და ამაზე მუშაობს ტრანსპორტის სამსახური”, — განაცხადა კახა კალაძემ.
აღნიშნული პროექტის ღირებულება 200 000 ლარს შეადგენს. სამუშაოები, რომელსაც კომპანია „ენ სი“ აწარმოებს, რამიშვილის ქუჩაზე მიმდინარე წლის 11 აპრილს დაიწყო და ერთ თვეში დასრულდება.
