თბილისი, 14 მარტი — Sputnik. „მთის კურორტების განვითარების კომპანია“ ზვავსაშიშროების დონის გაზრდის გამო მთაში მყოფ ტურისტებსა და დამსვენებლებს სიფრთხილისა და ყურადღების გამოჩენისკენ მოუწოდებს.
„ბუნებრივი კლიმატური პირობების გამო, გაიზარდა ზვავსაშიშროების საფრთხე გაუკვალავ თოვლში სრიალის მოყვარულთათვის. სწორედ ამიტომ, თქვენივე უსაფრთხოებისთვის გთხოვთ, მოქმედ სათხილამურო კურორტებზე დაემორჩილოთ ადმინისტრაციასა და სათხილამურო გზებზე მომზადებულ მარკირებულ ნიშნებს“, — ნათქვამია კომპანიის პრესსამსახურის განცხადებაში.
„მთის კურორტების განვითარების კომპანიაში“ მოუწოდებენ, მაქსიმალური სიფრთხილე გამოიჩინონ ლომისას, კობის, თრუსოს, ყაზბეგის, ჯუთას, უშბის, თეთნულდის, უშგულის, ბაკურიანის, გოდერძის, ბახმაროსა და თუშეთის ტერიტორიებზე გაუკვალავ თოვლში სრიალისას.
ამ სეზონზე ტურისტებს მასპინძლობს ოთხი სამთო-სათხილამურო კურორტი: გუდაური, ბაკურიანი, გოდერზი, მესტია. წელს ყველაზე თამამი მოყვარული ტურისტები ავიდნენ ბახმაროშიც, სადაც ამ კურორტის განვითარების მიზნით ინფრასტრუქტურული სამუშაოები ჯერ მხოლოდ იწყება.
2018 წლის თებერვალში საქართველოს ეწვია 440,8 ათასი მოგზაური, რაც გასული წლის ანალოგიურ პერიოდთან შედარებით 73 ათასით მეტია (20%).
