თბილისი, 9 მარტი — Sputnik. საქართველოში დღის მეორე ნახევარში ამოვარდნილი ძლიერი ქარის გამო, სახანძრო-სამაშველო სამსახურის გამოძახების მოთხოვნით 250-ზე მეტი ზარი განხორციელდა, მათ შორის, 166 თბილისში, ნათქვამია საგანგებო სიტუაციების მართვის სამსახურის Facebook-გვერდზე გავრცელებულ განცხადებაში.
სამსახურის ცნობით, თბილისში, სახანძრო-სამაშველოს გამოძახების ყველაზე მეტი ფაქტი დაფიქსირდა დიდ დიღომში, დიღმის მასივში, საბურთალოზე, ისნისა და სამგორის რაიონებში.
ძირითადად, ზარები უკავშირდება შენობა-ნაგებობების დაზიანებას, ხეების წაქცევას, ბილბორდებისა და ელექტრობოძების დაზიანებას.
კერძოდ, დიდ დიღომში, ნესტან-დარეჯნის ქუჩაზე, სახურავიდან თუნუქის ფურცელი ჩამოვარდა და მანქანას დაეცა.
აღმაშენებლის ხეივანზე შენობის მე-13 და მე-14 სართულიდან მინები ჩამოვარდა. სახანძრო-სამაშველო სამსახურმა ვიტრაჟების დემონტაჟი განახორციელა და სხვა მინების ჩამოვარდნა თავიდან აიცილა, იტყობინება საგანგებო სიტუაციების მართვის სამსახური.
დაშავებულების შესახებ ინფორმაცია არ ვრცელდება.
