თბილისი, 8 მარტი – Sputnik. თბილისში N150 ავტობუსის მძღოლმა ურთიერთშელაპარაკებისას ცივი იარაღით ოთხი თანმხლები პირი დაჭრა, ნათქვამია საქართველოს შინაგან საქმეთა სამინისტროს პრეს-სამსახურის მიერ გავრცელებულ განცხადებაში.
უწყების ინფორმაციით, ოთხშაბათს, 7 მარტს თბილისში, გახოკიძის ქუჩაზე N150 ავტობუსის მძღოლები კვების ერთ-ერთ ობიექტში იმყოფებოდნენ. ობიექტიდან გამოსვლის შემდეგ ნასვამ მძღოლებს ავტობუსში ურთიერთშელაპარაკება მოუხდათ.
„ერთ-ერთმა მძღოლმა — 1960 წელს დაბადებულმა ი.ჩ.-მ ურთიერთშელაპარაკებისას ცივი იარაღით სხეულზე დაზიანებები მიაყენა თანმხლებ პირებს — ამავე ავტობუსის მძღოლებს: 1977 წელს დაბადებულ ა.ზ.-ს, 1965 წელს დაბადებულ გ.კ.-ს, 1967 წელს დაბადებულ ვ.ი.-ს და 1961 წელს დაბადებულ გ.კ.-ს, რის შემდეგაც თვითდაზიანება მიიყენა და შემთხვევის ადგილიდან მიმალვა სცადა“, – ნათქვამია სამინისტროს ინფორმაციაში.
სამართალდამცველებმა მძღოლი ადგილზე დააკავეს და საავადმყოფოში გადაიყვანეს.
ასევე, უწყების ცნობით, ინციდენტში მონაწილე ყველა მძღოლი იდენტიფიცირებულია. დაჭრილი პირები საავადმყოფოში არიან გადაყვანილი და მათ მკურნალობენ.
გამოძიება საქართველოს სსკ-ის 109-ე მუხლის მე-3 ნაწილით დაიწყო, რაც დამამძიმებელ გარემოებაში ორი ან მეტი პირის მიმართ ჩადენილ განზრახ მკვლელობის მცდელობას გულისხმობს და ისჯება თავისუფლების აღკვეთით ვადით 16-დან 20 წლამდე ან უვადო თავისუფლების აღკვეთით.
