თბილისი, 28 თებერვალი — Sputnik. რვა ქართველი დიზაინერი 28 თებერვლიდან 6 მარტამდე წარდგება პრესტიჟულ პარიზულ შოუ-რუმში MoreDash.
MoreDash Sales & PR Agency – დიზაინერთა ხელშეწყობის საერთაშორისო სააგენტოა, რომლის კურატორები არიან დარია შაპოვალოვა — Mercedes-Benz Kiev Fashion Days-ის დამფუძნებელი და კრეატიული დირექტორი და ასევე ნატალია მოდენოვა — MBKFD-ს გენერალური დირექტორი.
ღონისძიება პარიზის მოდის კვირეულის ფარგლებში წელიწადში ოთხჯერ ტარდება და მოდის სამყაროში ერთ-ერთ ყველაზე მასშტაბურ მოვლენას წარმოადგენს. ღონისძიებაზე იკრიბება 100-მდე კომპანიის წარმომადგენელი, 130 ბაიერი და მთელი მსოფლიოს მედია.
MoreDash-ის შოუ-რუმში საქართველოს ეკონომიკისა და მდგრადი განვითარების სამინისტროს ინიციატივით და სააგენტოს „აწარმოე საქართველოში“ მხარდაჭერით წარმოდგენილია შემდეგი ქართველი დიზაინერები: N-Duo, Dalood, Anouki, Tamuna Ingorokva, Lako Bukia, Brand Lalo, Material Tbilisi, Lya.
ქართველი დიზაინერები ცნობილ ბაიერებს 2018 წლის შემოდგომა-ზამთრის კოლექციებს გააცნობენ, კონტაქტებს დაამყარებენ და ახალ საერთაშორისო დონეზე გასვლას შეძლებენ.
