თბილისი, 20 იანვარი – Sputnik. საქართველოს პრემიერ-მინისტრი გიორგი კვირიკაშვილი 22 იანვარს შვეიცარიულ დავოსში გაემგზავრება, სადაც რიგით 48-ე მსოფლიო ეკონომიკურ ფორუმს დაესწრება, იუწყება საინფორმაციო სააგენტო Новости-Грузия პრემიერის ადმინისტრაციაზე დაყრდნობით.
23 იანვარს საქართველოს მთავრობის მეთაური მიიღებს მონაწილეობას დისკუსიაში სახელწოდებით Strategic Outlook – Eurasia.
დაგეგმილია კვირიკაშვილის ორმხრივი მოლაპარაკებები სხვადასხვა ქვეყნების პოლიტიკურ ლიდერებთან და წამყვანი მსოფლიო კომპანიების წარმომადგენლებთან.
ქართველი პრემიერის შეხვედრების ზუსტ განრიგს ადმინისტრაცია მოგვიანებით გაავრცელებს.
ქართული დელეგაციის შემადგენლობაში შევლენ საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე, ფინანსთა მინისტრი მამუკა ბახტაძე, „თანაინვესტირების ფონდის“ აღმასრულებელი დირექტორი გიორგი ბაჩიაშვილი. ვიზიტი 24 იანვარს დასრულდება.
მსოფლიო ეკონომიკურ ფორუმს, რომელიც წელს 23-26 იანვარს გაიმართება, დაესწრებიან საფრანგეთის პრეზიდენტი ემანულელ მაკრონი, დიდი ბრიტანეთის პრემიერ-მინისტრი ტერეზა მეი, ინდოეთისა და კანადის პრემიერები ნარენდრა მოდი და ჯასტინ ტრუდო.
აშშ-ის პრეზიდენტ დონალდ ტრამპის მონაწილეობის საკითხი ჯერჯერობით გადაწყვეტილი არ არის.
მსოფლიო ეკონომიკური ფორუმი (World Economic Forum) — საერთაშორისო არასამთავრობო ორგანიზაციაა. შეიქმნა 1971 წელს, როდესაც ჟენევაში სიმპოზიუმზე ევროპის 400 წამყვანი კომპანიის ხელმძღვანელი შეიკრიბა. 1971 წლიდან 1986 წლამდე ორგანიზაციას „მენეჯმენტის ევროპული ფორუმი“ (European Management Forum) ეწოდებოდა.
ფორუმის პირველ შეხვედრებზე ძირითადი განსახილველი თემა — კონკურენტულ ბრძოლაში დასავლეთ ევროპის პოზიციების გაუმჯობესება იყო. დროთა განმავლობაში თემატიკა თანდათან გაფართოვდა, დაემატა პოლიტიკური და ეკონომიკური საკითხები, სამეცნიერო–ტექნიკური პროგრესის შედეგები, განვითარებადი ქვეყნების დავალიანების პრობლემები.
1970-იანი წლების შუა პერიოდში დავოსში მსოფლიოს გავლენიანი პირების მიწვევა დაიწყეს (მთავრობების წევრებისა და ბიზნესის ლიდერებისა) და უკვე მომდევნო ათწლეულში ფორუმმა წლის ერთ–ერთი უმთავრესი მოვლენის სტატუსი შეიძინა.
