თბილისი, 23 დეკემბერი — Sputnik. ბორჯომიდან ჩამოტანილი დამწვარი ნაძვის ხეები სპორტის სასახლესთან 23 დეკემბრიდან 30 დეკემბრის ჩათვლით გამოიფინება, იუწყება ტელეკომპანია „იმედი“ (Imedi).
სოციალური აქციის ორგანიზატორი კრეატიული სააგენტო „ლივინგსტონი” და სააგენტო „ტრიპექსია“.
აქციის მიზანი ბორჯომის დამწვარი ტყე–პარკის აღდგენაა.
„სტიქია, რომელიც ამ ზაფხულს საქართველოში ტყეებს დაატყდა თავს და 1000-მდე ჰექტარი გაანადგურა, თითქოს ყველამ უკვე დაივიწყა. პრობლემამ აქტუალურობა დაკარგა, თუმცა მის მოსაგვარებლად საზოგადოების ჩართვა კვლავ მნიშვნელოვანია, დროა, ბუნების გადასარჩენად კიდევ ერთი საახალწლო ტრადიცია დავნერგოთ — ამ ახალ წელს ლამაზი ნაძვის სახლში დადგმასთან ერთად, ერთი ნამდვილი ხეც დავრგოთ იქ, სადაც ყველაზე მეტად გვჭირდება", — აცხადებენ ორგანიზატორები.
აქციის ფარგლებში შეიქმნა სპეციალური ვებგვერდი borjomistvis.ge, სადაინაც ნებსმიერ მსურველს შეუძლია მარტივად დარგოს ხე — მაუსის ორი დაწკაპუნებით შესაძლებელია დარგო ნაძვის ხე ბორჯომის ხეობაში და აჩუქო ის მეგობარს, ოჯახს ან საკუთარ თავს.
სპორტის სასახლესთან საშობაო ბაზრობაზე სპეციალური კონსულტანტები მსურველებს ბორჯომის ხეობაში ხის დარგვაში დაეხმარებიან.
