თბილისი, 21 დეკემბერი — Sputnik. ფრიდრიც ნაუმანის ფონდის „თავისუფლების ბარომეტრის (Freedom Barometer) თანახმად, საქართველომ ევროპის 30 ქვეყანას შორის თავისუფლების ხარისხით მე-13 ადგილი დაიკავა.
„თავისუფლების ბარომეტრი" თავისუფლების სამ ტიპს ზომავს: პოლიტიკურს, ეკონომიკურსა და კანონის უზენაესობას.
მიმდინარე წელს საქართველომ აიღო 67,10 ქულა, რაც 2016 წელთან შედარებით 1,6 ქულით მეტია.
ანგარიშში ქვეყნის მიღწევები რამდენიმე მიმართულებით არის აღნიშნული. უმაღლესი შეფასება მიიღო საქართველოს საერთაშორისო ვაჭრობის თავისუფლებამ (8,86 ქულა), ასევე მთავრობის ხარჯებმა მშპ-თან მიმართებით და გადასახადების დონემ (8,09).
2016 წელთან შედარებით საქართველოში ყველაზე მეტად გაუმჯობესდა რეიტინგი სასამართლო ხელისუფლების დამოუკიდებლობის თვალსაზრისით — 5,67 ქულა (+0,67).
ყველაზე დაბალი შეფასება საქართველოს ერგო მასმედიის თავისუფლების თვალსაზრისით (5,00).
რაც შეეხება საქართველოს უახლოეს მეზობლებს, სომხეთი რეიტინგის 22-ე ადგილზეა (55,0), თურქეთი — 26-ეზე (49,60), აზერბაიჯანი — 28-ეზე (43,90), ხოლო რუსეთი — 30-ეზე (41,80).
პირველ ადგილზე გავიდა ჰოლანდია (83,80), შემდეგ მოდიან ესტონეთი (80,10), გერმანია (80,10), ბელგია (78,40), ავსტრია (76,80) და სხვა ქვეყნები.
