თბილისი, 15 დეკემბერი — Sputnik. სომხეთის პრეზიდენტ სერჟ სარგსიანის ვიზიტი საქართველოში 25-26 დეკემბერს იგეგმება, იუწყება РИА Новости საქართველოს მთავრობის პრესსამსახურზე დაყრდნობით.
უწყების თქმით, საქართველოს პრემიერ-მინისტრი გიორგი კვირიკაშვილი შეხვდა სომხეთის ელჩს რუბენ სადოიანს. მხარეებმა ერევანში კვირიკაშვილის გადადებული ვიზიტი განიხილეს.
„საუბარი შეეხო ორმხრივი თანამშრომლობის საკითხებს. მხარეები მიესალმნენ ურთიერთობების განვითარების დადებით დინამიკას და ხაზი გაუსვეს საქართველოში სომხეთის პრეზიდენტის ვიზიტის მნიშვნელობას, რომელიც 25-26 დეკემბერს შედგება. ქართველი პრემიერის ოფიციალური ვიზიტი სომხეთში მომდევნო წლის დასაწყისში შედგება“, — განაცხადეს პრესსამსახურში.
ვარაუდობდნენ, რომ კვირიკაშვილი ერევანს დეკემბრის დასაწყისში სომეხი კოლეგის — კარენ კარაპეტიანის თხოვნით ესტუმრებოდა. ვიზიტის ფარგლებში დაგეგმილი იყო შეხვედრები სარგსიანთან, პარლამენტის სპიკერ აროი ბაბლოიანთან და პრემიერ-მინისტრ კარაპეტიანთან. მაშინ ქართველი პრემიერის ვიზიტი გაურკვეველი დროით გადაიდო. თბილისში აღნიშნეს, რომ ვიზიტი მას შემდეგ შედგება, რაც საქართველოს პარლამენტი მთავრობის შემადგენლობას დაამტკიცებს.
