თბილისი, 12 დეკემბერი — Sputnik. საქართველოს სახელმწიფო უსაფრთხოების სამსახურის (სუს-ი) თანამშრომლებმა ქრთამის აღების ბრალდებით კრწანისის რაიონის გამგეობის სამხედრო განყოფილების წამყვანი სპეციალისტი მერაბ გ. დააკავეს, ნათქვამია უწყების მიერ გავრცელებულ განცხადებაში.
გამოძიებამ დაადგინა, რომ ბრალდებულმა სამხედრო სავალდებულო სამსახურის გადავადების სანაცვლოდ, 25 წლის ახალგაზრდას ქრთამის სახით 1000 ლარის გადახდა მოსთხოვა.
„დაკავებულმა 8 დეკემბერს აღნიშნულ მოქალაქეს თანხის ნაწილი 650 ლარი გამოართვა და განუმარტა, რომ ის სამხედრო სავალდებულო სამსახურიდან გათავისუფლებული იყო. 11 დეკემბერს კი მოქალაქეს ქრთამის სახით მოთხოვნილი თანხის დარჩენილი ნაწილი- 350 ლარი გამოართვა, რა დროსაც იგი ბრალდებულის სახით დააკავეს", — აღნიშნულია განცხადებაში.
გამოძიება ქრთამის აღების ფაქტზე მიმდინარეობს საქართველოს სსკ-ის 338-ე მუხლის პირველი ნაწილით, რაც ითვალისწინებს 6-დან 9-წლამდე ვადით თავისუფლების აღკვეთას.
გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს.
