თბილისი, 27 ნოემბერი — Sputnik. აზერბაიჯანის პრეზიდენტმა ილჰამ ალიევმა საქართველოს პრეზიდენტ გიორგი მარგველაშვილს წერილი გამოუგზავნა, სადაც ბათუმის სასტუმროში ხანძრის გამო დატრიალებული ტრაგედიის გამო ქართველ ხალხს და დაღუპულთა ოჯახებს უსამძიმრებს და დაშავებულებს მალე გამოჯანმრთელებას უსურვებს, იუწყება „Sputnik-აზერბაიჯანი" სახელმწიფო მეთაურის ოფიციალურ ვებ-გვერდზე განთავსებულ განცხადებაზე დაყრდნობით.
ხანძარი სასტუმრო „ლეოგრანდში" პარასკევს, დაახლოებით 20:00 საათზე გაჩნდა. ხანრის ეპიცენტრი, სავარაუდოდ, სპა–სალონში იყო. შედეგად დაიღუპა 11 ადამიანი, დაშავდა 21. ერთ-ერთი დაღუპული ირანის, დანარჩენები — საქართველოს მოქალაქეები არიან.
„ძალიან ვწუხვარ ბათუმის სასტუმროში ხანძრის შედეგად დაღუპულებისა და დაშავებულების გამო. ამ ტრაგედიასთან დაკავშირებით ჩემი და აზერბაიჯანელი ხალხის სახელით გისამძიმრებთ თქვენ, დაღუპულთა ოჯახებსა და ახლობლებს, მთელ ქართველ ხალს, დაშავებულებს გამოჯანმრთელებას ვუსურვებ", — ნათქვამია გზავნილში.
დღეს საქართველოში გლოვის დღეა გამოცხადებული. ქვეყნის მთელ ტერიტორიაზე დაშვებულია სახელმწიფო დროშები.
