თბილისი, 13 ნოემბერი — Sputnik. შსს-ს სასაზღვრო პოლიციისა და სახმელეთო საზღვრის დაცვის დეპარტამენტის თანამშრომლებმა „სარფის" სასაზღვრო–გამშვები პუნქტის დასაცავ მონაკვეთზე სომალის რესპუბლიკის სამი მოქალაქე დააკავეს საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ფაქტზე, იუწყება შსს-ს პრეს-სამსახური.
როგორც გამოძიებამ დაადგინა, ბრალდებულები სასაზღვრო საკონტროლო–გამტარი პუნქტის გვერდის ავლით საქართველოს სახელმწიფო საზღვრის გადაკვეთას ცდილობდნენ თურქეთის რესპუბლიკის მიმართულებით.
გამოძიება საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ფაქტზე მიმდინარეობს (საქართველოს სსკ-ის 19-344-ე მუხლის მე-2 ნაწილის "ა" ქვეპუნქტით).