თბილისი, 10 ნოემბერი — Sputnik. იუნესკოს გენერალური კონფერენციის 39-ე სესიაზე, რომელიც პარიზში პარასკევს გაიმართა, ორგანიზაციის გენერალური დირექტორის პოსტზე საფრანგეთის კულტურის ექს-მინისტრი ოდრი აზულე დაამტკიცეს, იუწყება РИА Новости.
ბულგარეთის წარმომადგენელ ირინა ბოკოვას, რომელიც გენერალური დირექტორის პოსტს 2009 წლიდან ზედიზედ ორი ვადის განმავლობაში იკავებს, უფლებამოსილება ეწურება.
აზულეს მხარი დაუჭირა 131-მა ქვეყანამ, წინააღმდეგი იყო 19. კენჭისყრაში მიღების უფლება 184 ქვეყნის წარმომნადგენელს ჰქონდა.
ოდრი აზულე ოქტომბრის დასაწყისში იუნესკოს გენერალური დირექტორი ორგანიზაციის აღმასრულებელი საბჭოს კენჭისყრის შედეგებით გახდა. ბოლო ტურში მისი ოპონენტი დიპლომატი კატარიდან ჰამად ბინ აბდულაზიზ ალ-კავარი იყო.
„ვფიქრობ, რომ სირთულეები, რომლებსაც დღეს იუნესკო აწყდება — ეს არის პოლიტიკური და ფინანსური სირთულეები, მაგრამ არა სტრატეგიული“, — განაცხადა აზულემ სესიაზე.
აშშ-ის იუნესკოდან გამოსვლის გადაწყვეტილების კომენტირებისას, ახალმა გენერალურმა დირექტორმა აღნიშნა, რომ ორგანიზაცია გააგრძელებს „ღია კარის პოლიტიკას და აშშ-ის სამოქალაქო საზოგადოებებთან მუშაობას“.
„ვფიქრობ, რომ ეს როგორც იუნესკოს, ისე ამ ქვეყნების ინტერესებშია — ერთობლივი მუშაობის გაგრძელება. ისტორია გვიჩვენებს, რომ ასეთი ტიპის ორგანიზაციებიდან გამოსვლამ, საერთაშორისო მოლაპარაკებებიდან გამოსვლამ კატასტროფა შეიძლება გამოიწვიოს“, — ხაზგასმით აღნიშნა აზულემ.
მისი თქმით, ორგანიზაციის ყველა წევრ ქვეყანასთან დიალოგი იუნესკოს საერთო ამოცანას წარმოადგენს.
