თბილისი, 9 ნოემბერი — Sputnik. ბერლინის კედლის ფრაგმენტი ევროპის მოედანზე საზეიმო ვითარებაში დაიდგა.
საზეიმო ცერემონიაში მონაწილეობდნენ საქართველოს პრემიერ-მინისტრი გიორგი კვირიკაშვილი, გერმანიის ფედერაციული რესპუბლიკის ელჩი საქართველოში ჰაიკე პაიჩი, საქართველოს ელჩი გერმანიაში ლადო ჭანტურია და სხვა ოფიციალური პირები. ბერლინის კედლის ფრაგმენტი — საჩუქარია, რომელიც კვირიკაშვილს 16 ივნისს გერმანიაში ვიზიტისას გადაეცა, როგორც ქართულ-გერმანული მეგობრობის სიმბოლო.
"გერმანელი ხალხის საჩუქარი ქართველ ხალხს ჩამოუვიდა საქართველოში იმის ნიშნად, რომ როგორც დასრულდა უდიდესი უსამართლობა გერმანელი ხალხის მიმართ და დაინგრა კედელი, რომელიც გერმანელ ხალხს ხელოვნურად ორად ჰყოფდა, ასევე საქართველოში ბოროტების მიერ აღმართული კედელი დაინგრევა და დაინგრევა ასევე მშვიდობიანად, ხაზს ვუსვამ, ვინაიდან ყოველთვის, როდესაც ცივილიზებული სამყარო ერთად დგება, მიზანმიმართული, სწორი ნაბიჯებით და გაბედული პოლიტიკით შესაძლებელია ასეთი შედეგის მიღწევა", — განაცხადა კვირიკაშვილმა.
მან აღნიშნა, რომ წელს საქართველო-გერმანიას შორის დიპლომატიური ურთიერთობების დამყარებიდან 25 წლისთავი აღინიშნება და გერმანიის ხალხსა და მთავრობას ასეთი სიმბოლური და მნიშვნელოვანი საჩუქრისთვის მადლობა გადაუხადა.
კვირიკაშვილმა ასევე საქართველოს მეორე პრეზიდენტი ედუარდ შევარდნაძე ახსენა, რომელმაც სსრკ-ის საგარეო საქმეთა მინისტრის პოსტზე ბერლინის კედლის ნგრევისა და გერმანიის გაერთიანების პროცესში ერთ-ერთი უმნიშვნელოვანესი როლი ითამაშა.
"მე ძალიან მაკვირვებს, რომ ედუარდ შევარდნაძის სურათი ვერ მოხვდა ამ გამოფენაში, ვინაიდან საქართველოს პრეზიდენტის, მაშინდელი საბჭოთა კავშირის საგარეო საქმეთა მინისტრის როლი ამ მსოფლიო მნიშვნელობის მოვლენაში იყო მნიშვნელოვანი და ეს აუცილებლად უნდა აღინიშნოს. იმიტომ, რომ ისტორია არის ისტორია", — ხაზგასმით აღნიშნა კვირიკაშვილმა.
გერმანიის იმდროინდელი ისტორიული მოვლენები აისახა სტენდებზე, რომლებიც თბილისში ევროპის მოედანზე განთავსდა.
გერმანია ევროპული თანამეგობრობის პირველი ქვეყანა იყო, რომელმაც საქართველოს დამოუკიდებლობა აღიარა. 1992 წელს ქვეყნებმა დიპლომატიური ურთიერთობები დაამყარეს და საქართველოში გერმანიის საელჩო გაიხსნა. საქართველო და გერმანია თანამშრომლობენ ვაჭრობის, ეკონომიკის, უსაფრთხოების, კულტურისა და განათლების სფეროებში.
ედუარდ შევარდნაძემ, როგორც სსრკ-ის წარმომადგენელმა, საკუთარი ხელმოწერა დატოვა ე.წ. "ხელშეკრულება 2+4"-ზე, რომელშიც გერმანიის გაერთიანების საგარეოპოლიტიკური ასპექტები დაფიქსირდა.
ხელშეკრულებას, რომელსაც "დიპლომატიის ვარსკვლავურ საათს" უწოდებენ, მოსკოვში 1990 წლის 12 სექტემბერს ხელი მოაწერეს: გერმანიის დემოკრატიულმა რესპუბლიკიკამ, გერმანიის ფედერაციულმა რესპუბლიკამ, ასევე საფრანგეთმა, აშშ-ბმა, დიდმა ბრიტანეთმა და სსრკ-მა.
