თბილისი, 8 ნოემბერი — Sputnik. თბილისში საერთაშორისო საავიაციო ფორუმი Connect 2018 წლის 20-23 თებერვლის ფარგლებში გაიმართება, აცნობეს „Sputnik–საქართველოს" „საქართველოს აეროპორტების გაერთიანების" პრეს-სამსახურში.
მე-15 ფორუმზე თბილისს 500 დელეგატი ეწვევა — 250 აეროპორტისა და 65 ავიაკომპანიის წარმომადგენლები მთელი მსოფლიოდან. განხილვის ერთ-ერთი მთავარი თემა იქნება საჰაერო ტრანსპორტის სფეროს სამომავლო განვითარება და კავშირების დამყარება.
„თბილისი არის ზღაპრული მიმართულება და ბევრისთვის დამალული საგანძური… ის ამაყობს ზღაპრული ტურისტული ღირსშესანიშნაობებით და დინამიკური, მომავალზე ორიენტირებული ეკონომიკით. თბილისი შესანიშნავად ასახავს CONNECT-ის სულს, როგორც ბიზნესის კეთებისთვის ხელმისაწვდომი ადგილი და ხელს უწყობს CONNECT-ის ზრდას, ვინაიდან ჩვენი ღონისძიება მოიზიდავს ახლო აღმოსავლეთისა და აზიის უფრო მეტ ავიაკომპანიას და აეროპორტს", — ციტირებს Airport Agency France-ის აღმასრულებელი დირექტორის სიტყვებს „საქართველოს აეროპორტების გაერთიანების" პრეს-სამსახური.
ფორუმი „საქართველოს აეროპორტების გაერთიანების" ორგანიზებითა და საქართველოს მთავრობის სრული მხარდაჭერით ჩატარდება.
საერთაშორისო საავიაციო ფორუმი 2004 წელს დაარსდა Airport Agency France-ს ინიციატივით. მისი მიზანი სამოქალაქო ავიაციის განვითარებაა. ფორუმი წელიწადში ერთხელ იმართება. 2017 წელს ავიაფორუმი კუნძულ კორსიკაზე, ქალაქ აიაჩოში გაიმართა.
