თბილისი, 1 ნოემბერი — Sputnik. იტალიის ქალაქ ვიჩენცაში მცხოვრებმა მამაკაცმა ერთ დღეში ორი თავზარდამცემი ამბავი გადაიტანა: სამსახურიდან დაბრუნებულმა აღმოაჩინა, რომ სახლი პირწმინდად გაექურდათ, მერე კი შეიტყო, რომ ცოლი მეზობელთან ღალატობდა, იუწყება საინფორმაციო სააგენტო РИА Новости.
იტალიური მასმედიის ინფორმაციით, 54 წლის მამაკაცის სახლში ფანჯრიდან გადამძვრალ მძარცველებს მთელი ძვირფასეულობა და იარაღის სპეციალური კარადა წაეღოთ, რომელშიც შვიდი სანადირო თოფი ინახებოდა. სასოწარკვეთილი კაცი მეზობელთან გადავიდა, რათა ეკითხა, ვინმე ან რამე ხომ არ შეუნიშნავს მისი სახლის ახლომახლო. მაგრამ ვერაფრის გარკვევა ვერ მოახერხა, ვინაიდან იქ მეორე უსიამოვნება ელოდა მეზობლის ლოგინში მწოლიარე საკუთარი ცოლის სახით.
არავინ იცის, როგორ დამთავრდებოდა საქმე, ქურდებს კაცის მთელი იარაღი რომ არ მოეპარათ. ამასთან პოლიცია, რომელიც სახლის გაქურდვის გამო ჰყავდა მამაკაცს გამოძახებული, უკვე ადგილზე იყო და გაცოფებული ქმრის შეკავება მოახერხეს.
აღსანიშნავია, რომ სამართალდამცველებმა უკვე იპოვეს მოპარული იარაღი, თუმცა მფლობელისთვის გადაცემას არ ჩქარობენ.