თბილისი, 25 ოქტომბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა თაღლითობის ბრალდებით ორი პირი დააკავეს, ნათქვამია უწყების ვებგვერდზე გამოქვეყნებულ განცხადებაში.
გამოძიების მტკიცებით, რომ 2016 წლის დეკემბრიდან 2017 წლის მარტის პერიოდში, ბრალდებულებმა შეიძინეს BMW X5 მარკის 5 გაუმართავი ავტომანქანა, რამდენიმე შემთხვევაში მათ მხოლოდ ავტომანქანის ძარის შეძენა მოახდინეს.
ამის შემდგომ, ერთ-ერთმა ბრალდებულმა აღნიშნული სატრანსპორტო საშუალებების უზრუნველყოფით სესხის აღების მიზნით, ფინანსურ ორგანიზაციას მიმართა.
მეორე ბრალდებულმა, ამავე ფინანსური ორგანიზაციის ექსპერტ-შემფასებელმა, ავტომანქანების დათვალიერების შემდეგ გასცა არასწორი დასკვნა მასზედ, რომ მანქანები გამართულ მდგომარეობაშია. ამგვარად, თაღლითებმა 60 000 ლარზე მეტი თანხა მიითვისეს.
სისხლის სამართლის საქმე აღძრულია სსკ-ის 180-ე მუხლით „დიდი ოდენობით თაღლითობა", რაც თავისუფლების აღკვეთას 6-დან 9 წლამდე ვადით ითვალისწინებს.
