თბილისი, 9 ოქტომბერი — Sputnik. საქართველოდან კარტოფილის ექსპორტი, პროდუქტის მაღალი ხარისხის გამო, გასულ წელთან შედარებით შვიდჯერ გაიზარდა, აღნიშნულია საქართველოს სოფლის მეურნეობის სამინისტროს განცხადებაში.
უწყების მონაცემებით, კარტოფილის უხვი მოსავლის წყალობით, წელს ექსპორტმა 35 ათას ტონას გადააჭარბა.
საქართველოში კარტოფილის წარმოების დიდი წილი სამცხე–ჯავახეთის რეგიონზე მოდის და ქვეყნის მთლიან წარმოებაში 64%-ს შეადგენს. სოფლის მეურნეობის მინისტრი ლევან დავითაშვილი სამცხე–ჯავახეთის რეგიონის გუბერნატორ აკაკი მაჭუტაძესთან ერთად ახალქალაქში კარტოფილის მოსავლის დაბინავების პროცესს გაეცნო.
ლევან დავითაშვილმა ახალქალაქის რაიონში თანამედროვე სტანდარტებით აღჭურვილი პროდუქციის შემნახველი მეურნეობა დაათვალიერა, რომელიც „ერთიანი აგროპროექტის" ფარგლებში გაფართოვდა. პროდუქციის შემნახველ მეურნეობაში წლიურად 600 ტონა კარტოფილი და 200 ტონა მარცვლეული კულტურის შენახვაა შესაძლებელი. საწარმოში 20 ადგილობრივი მოსახლეა მუდმივად დასაქმებული, ხოლო სეზონურად დასაქმებულთა რიცხვი 50 ადამიანით იზრდება.
„ჯავახეთის რეგიონი ერთ-ერთი მნიშვნელოვანი რეგიონია კარტოფილის წარმოების თვალსაზრისით. მოსავლის ზრდა რამდენიმეწლიანი დაუღალავი თანმიმდევრული მუშაობის შედეგია, რაც გულისხმობს იმას, რომ ერთი მხრივ ფერმერებთან მივიტანეთ ცოდნა თანამედროვე ტექნილოგიების გამოყენების კუთხით და შესაბამისად, მათ გაზარდეს პროდუქტიულობა", – განაცხადა დავითაშვილმა.
„ერთიანი აგროპროექტი" სასოფლო–სამეურნეო პროდუქტების მართვის სააგენტოს პროგრამაა, რომელიც წარმოების გრძელვადიან განვითარებაზეა გათვლილი. პროექტის მიზანია სოფლის მეურნეობის სფეროში კონკურენტუნარიანობის ზრდისა და მაღალი ხარისხის წარმოების სტაბილური ზრდის ხელშეწყობა.
