თბილისი, 27 სექტემბერი — Sputnik. სომეხი დიდოსტატი ლევონ არონიანი თბილისში ჭადრაკში მსოფლიო თასის გამარჯვებული გახდა.
ფინალურ შეხვედრაში არონიანმა, რომელიც ფიდეს მსოფლიო რეიტინგში მეოთხე ადგილს იკავებს, ტაი-ბრეიკზე ჩინელ დინ ლიჟენს (13) მოუგო.
ფინალის პირველი ოთხი კლასიკური პარტია ყაიმით დასრულდა, ხოლო ტაი-ბრეიკზე არონიანმა პირველი პარტია თეთრებით, ხოლო მეორე — შავებით მოიგო.
თბილისის მსოფლიო თასის ორივე ფინალისტმა მსოფლიო ჩემპიონის ტიტულისთვის პრეტენდენტთა ტურნირში მონაწილეობის უფლება მოიპოვა. ტურნირი 2018 წლის 10-28 მარტს ბერლინში ჩატარდება. ტურნირში ასევე მონაწილეობას მიიღებენ: სერგეი კარიაკინი, როგორც საჭადრაკო გვირგვინისთვის გასული მატჩის მონაწილე, ფიდეს უმაღლესი რეიტინგის მქონე ორი მოთამაშე, 2017 წლის გრან-პრის სერიის ორი საუკეთესო მოჭადრაკე და კიდევ ერთი დიდოსტატი, რომელიც ორგანიზატორების სპეციალურ მიწვევას მიიღებს.
თბილისში ჩატარებული მსოფლიო თასის ტურნირის საერთო საპრიზო ფონდი 1 მილიონ 600 000 დოლარს შეადგენდა, საიდანაც არონიანი 120 000 მიიღებს.
