თბილისი, 22 სექტემბერი — Sputnik. პარასკევს, 22 სექტემბერს, ფოლკლორის სახელმწიფო ცენტრის საგამოფენო დარბაზში თოჯინების ოსტატების მიერ შექმნილი შედევრების ექსპოზიცია იხსნება, იუწყება ფოლკლორის ცენტრის Facebook-გვერდი.
თოჯინების გამოფენაზე ფაიფურის, ცვილის, თიხის, რბილი, ეთნოგრაფიული თოჯინები და მარიონეტები გამოიფინება.
ექსპოზიციაზე წარმოდგენილი იქნება 30 მეთოჯინის სხვადასხვა ზომისა და ჟანრის 200-მდე ხელნაკეთი ორიგინალური თოჯინა.
გამოფენაზე მექანიკური თოჯინებიც გამოიფინება.
„საქართველოში უძველესი დროიდან სხვადასხვა ტიპის თოჯინა ამა თუ იმ წეს-ჩვეულების შესრულებისას გამოიყენებოდა, რაც მთავარია, ოდითგანვე თოჯინა ქართული ბავშვის საყვარელი სათამაშო იყო, ამიტომ მას მოფერებით „დედოფალა" შეარქვეს“, — ნათქვამია ფოლკლორის ცენტრის განცხადებაში.
გამოფენის ოფიციალური გახსნა 19:00 საათზეა დაგეგმილი. ექსპოზიცია საგამოფენო დარბაზ Hall Gallery-ში გაიხსნება და 4 ოქტომბრამდე გაგრძელდება. მისამართი: დავით აღმასენებლის გამზირი, №68.
საქართველოს ფოლკლორის სახელმწიფო ცენტრში ეს უკვე თოჯინების რიგით მეშვიდე გამოფენაა, ოთხი მათგანი საერთაშორისო იყო.
