თბილისი, 19 სექტემბერი — Sputnik. მმართველი პარტია „ქართული ოცნება — დემოკრატიული საქართველოს" დეპუტატების შემოსავლები 2016 წლის ნოემბრიდან 2017 წლის აგვისტოს პერიოდში, სხვა კანონმდებლებთან შედარებით, უფრო მეტია, ამის შესახებ ავტორიტეტული არასამთავრობო ორგანიზაცია „საერთაშორისო გამჭვირვალობა — საქართველოს" ანგარიშშია ნათქვამი.
არასამთავრობო ორგანიზაციის მონაცემებით, შევსებული დეკლარაციების თანახმად, წლის განმავლობაში ყველაზე მაღალი შემოსავლები ჰქონდათ მმართველი პარტიის დეპუტატებს: კახაბერ ოქრიაშვილს — 17,4 მლნ ლარზე მეტი, გრიგოლ მიქელაძეს — 1,2 მლნ ლარი, ელგუჯა გოცირიძეს — 1 მლნ ლარზე მეტი.
„საერთაშორისო გამჭირვალობა – საქართველოს" ახალი ანგარიში მიუთითებს, რომ პარლამენტის წევრების არადეკლარირებული ბიზნეს-აქტივები და მათ სტატუსთან შეუთავსებელი საქმიანობა პრობლემას წარმოადგენს მეცხრე მოწვევის პარლამენტისთვის", — აღნიშნულია დოკუმენტში.
ოფიციალური მონაცემების შესწავლის საფუძველზე გამოვლინდა პარლამენტარების ბიზნეს-ინტერესები. კერძოდ, 150 დეპუტატიდან 51-ს ბიზნეს-კავშირი აქვს და, შესაბამისად, ისინი ფლობენ წილებს სამეწარმეო სუბიექტებში.
პარლამენტის 16 წევრს არადეკლარირებული ბიზნეს-აქტივები აქვს, მათგან 14 წარმომადგენელი „უმრავლესობიდანაა", ორი კი – „პატრიოტთა ალიანსიდან", რომელთაგან ერთ-ერთი ვიცე-პრემიერი ირმა ინაშვილია.
კომპანიებში ყველაზე მეტ ბიზნეს-აქტივებს ფლობენ „ქართული ოცნების" დეპუტატები: ივლიანე წულაია — 31 კომპანია, ნინო წილოსანი (13 კომპანია) და კახაბერ ოქრიაშვილი (13 კომპანია).
ცხრა პარლამენტარი დარეგისტრირებულია როგორც დირექტორი. მათგან შვიდი „ქართული ოცნების" წევრია, ორი კი – „ევროპული საქართველოს" და „პატრიოტთა ალიანსის" წევრები.
საქართველოს სისხლის სამართლის კოდექსის თანახმად, დეკლარაციაში განზრახ არასრული ან არასწორი მონაცემების შეტანა ისჯება ჯარიმით ან საზოგადოებისთვის სასარგებლო შრომით ვადით 120-დან 200 საათამდე, ან თანამდებობის დაკავების ან საქმიანობის უფლების ჩამორთმევით სამ წლამდე ვადით.
ამასთან, დეპუტატის მიერ სამეწარმეო საქმიანობის განხორციელების შემთხვევაში პარლამენტი ვალდებულია განიხილოს პარლამენტის წევრის უფლებამოსილების ვადამდე შეწყვეტის საკითხი.
