თბილისი, 14 სექტემბერი — Sputnik. ცოდნის გარდა ადამიანს რწმენა და კეთილი თვისებები უნდა გააჩნდეს, ამ სიტყვებით მიულოცა საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სიონის ღვთისმშობლის მიძინების სახელობის ტაძარში ქადაგებისას მოსწავლეებს ახალი წლის დაწყება.
ოფიციალურად სასწავლო წელი 15 სექტემბერს იწყება, მაგრამ იმის გამო, რომ ეს დღე პარასკევს დაემთხვა, ზოგიერთ სკოლაში სწავლა 18 სექტემბერს დაიწყება. მიუხედავად ამისა, თითქმის ყველა საჯარო სკოლაში პირველი ზარი სწორედ 15 სექტემბერს დაირეკება.
„ცოდნის მიღება საკმარისი არ არის. ურწმუნო ადამიანის გონებაში ცოდნას მოაქვს უარყოფითი შედეგები. ცოდნასთან ერთად ადამიანს უნდა ჰქონდეს რწმენა, სარწმუნოება და კეთილი თვისებები", — განაცხადა პატრიარქმა.
ილია მეორის თქმით, ცოდნის მიღება ეს არის „ნათელი ქრისტესი", რომელიც თითოეულ ადამიანს გაანათლებს.
„ყოველმა ჩვენგანმა უნდა იცოდეს, რომ „ნათელი ქრისტესი" უნდა შემოვიდეს ჩვენში. ჩვენ გავუღოთ კარი და სარკმელი ჩვენი გულისა და გონებისა „ნათელსა ქრისტესა". ბევრი რამ არის დამოკიდებული ჩვენზე", — განაცხადა პატრიარქმა.
პატრიარქმა ტაძარში შეკრებილ მრევლს ასევე საეკლესიო ახალი წელი, ანუ ინდიქტიონი მიულოცა.
