თბილისი, 5 სექტემბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა დიდი ოდენობით ქონების თაღლითურად დაუფლების ფაქტზე ორი პირი დააკავეს, ნათქვამია უწყების ვებ-გვერდზე გავრცელებულ განცხადებაში.
გამოძიებით დადგინდა, რომ აღნიშნული პირები 2016–2017 წლებში ყალბი მინდობილობების გამოყენებით თბილისში თაღლითურად დაეუფლნენ გერმანიისა და ყაზახეთის ორი მოქალაქის კუთვნილ ჯამში 11 444 კვ.მ ფართობის მიწის ნაკვეთებს.
აღნიშნული მიწის ნაკვეთების საბაზრო ღირებულება 4 მლნ ლარს აღემატება.
მომხდარ ფაქტზე გამოძიება სსკ-ის 180-ე მუხლის მესამე ნაწილით („თაღლითობა, ჩადენილი ჯგუფურად, დიდი ოდენობით“) დაიწყო, რაც 6-დან 9 წლამდე ვადით თავისუფლების აღკვეთას ითვალისწინებს.
