თბილისი, 31 აგვისტო — Sputnik. თვითმფრინავი უკრაინიდან და ვერტმფრენები აზერბაიჯანიდან და თურქეთიდან, ასევე საქართველოდან ებრძვიან ხანძარს აბასთუმნის ტყეში, აღნიშნულია საქართველოს შსს-ს პრეს-სამსახურის განცხადებაში.
ხანძარი აბასთუმანთან ახლოს ტყეში სამშაბათს გაჩნდა. ავიაციის გარდა, ცეცხლის ჩაქრობაში ჩართულია შსს-ს საგანგებო სიტუაციების მართვის სააგენტოს, შსს-ს განსაკუთრებულ დავალებათა დეპარტამენტისა და დაცული ტერიტორიების სააგენტოს 1500-მდე თანამშრომელი. ტყეში გაიჭრა 5 კილომეტრამდე გზა და ხანძრის კერებთან შეყვანილია ხანძარსაწინააღმდეგო ტექნიკა.
შს მინისტრმა გიორგი მღებრიშვილმა ხუთშაბათს აბასთუმანში საველე შტაბში მორიგი თათბირი ჩაატარა, რომელსაც ესწრებოდნენ შსს-ს შესაბამისი ქვედანაყოფების ხელმძღვანელები და შტაბის სხვა წევრები. მათ აბასთუმნის ტყეში ხანძრის ლიკვიდაციის გეგმები და სტრატეგია განიხილეს.
"აბასთუმნის მიმდებარედ, ტყის მასივში გაჩენილი ხანძრის სალიკვიდაციო სამუშაოები უწყვეტ რეჟიმში მიმდინარეობს. საგანგებო შტაბი მუშაობას 24 საათიან რეჟიმში აგრძელებს", — ნათქვამია უწყების განცხადებაში.
ხანძრის ქრობის პროცესში აქტიურად ჩაერთო ავიაცია. ამ დროისთვის, ხანძრის ლოკალიზების სამუშაოებში საქართველოს 2, აზერბაიჯანის 1 და თურქეთის 2 ვერტმფრენი, ასევე, უკრაინის სახანძრო-სამაშველო თვითმფრინავი მონაწილეობს.
"დილიდან ჩვენ უკვე პოზიტიური დინამიკა გვაქვს. შეიძლება ითქვას, რომ ყველა ღია ცეცხლის კერა ფაქტობრივად არის ჩამქრალი. ძალიან ეფექტურად მუშაობს ავიაცია და ცოცხალი ძალა. ჩვენ გვაქვს აწყობილი სრულად კავშირგაბმულობა. პირდაპირი კავშირი აქვთ ხმელეთიდან ავიაციასთან, ვერტმფრენებთან, რომლებსაც კონკრეტულ კოორდინირებას აძლევენ, თუ სად უნდა დაისხას წყალი", — განუცხადა მღებრიშვილმა ჟურნალისტებს.
წინასწარი ინფორმაციით, ხანძარმა 5 ჰექტარი ტერიტორია მოიცვა.
