თბილისი, 8 აგვისტო — Sputnik. ქართველმა მარათონელმა დავით ხარაზიშვილმა მსოფლიო ჩემპიონატზე გარბენში 56-ე ადგილი დაიკავა. მისი დრო შეადგენდა 2 საათს, 24 წუთსა და 24 წამს. ჩემპიონატი ამ დღეებში ლონდონში მიმდინარეობს.
ხარაზიშვილი საქართველოს ერთადერთი წარმომადგენელი გახდა, რომელმაც მძლეოსნობაში მსოფლიო პირველობაზე კვალიფიკაციის მიღება შეძლო.
მარათონული გარბენის სტარტზე 100 სპორტსმენი გავიდა. აქედან 29-მ სხვადასხვა მიზეზის გამო ფინიშამდე მისვლა ვერ შეძლო.
მარათონის გამარჯვებული გახდა კენიელი ჯეფრი კირუი (2:08:27). მეორე ადგილი დაიკავა ეთიოპიელმა ტამირატ ტოლამ (2:09:49), ხოლო ბრინჯაო ტანზანიელ ალფონს ფელიქს სიმბუს ერგო (2:09:51).
ამ სეზონზე ხარაზიშვილის საუკეთესო შედეგი შეადგენს 2 საათს, 18 წუთსა და 4 წამს, ხოლო მისი საუკეთესო მიღწევაა 2:16:17.
