თბილისი, 5 აგვისტო — Sputnik. საქართველომ 2017 წლის პირველ შვიდ თვეში ექსპორტზე 84,3 მლნ დოლარის ღირებულების 38,3 მლნ ბოთლი ღვინო გაიტანა მსოფლიოს 44 ქვეყანაში, ნათქვამია საქართველოს სოფლის მეურნეობის სამინისტროს განცხადებაში.
რუსეთი კვლავ რჩება ქართული ღვინის მთავარ მომხმარებლად. საანგარიშო პერიოდში საქართველოდან რუსეთში 23,7 მლნ ბოთლზე მეტი ღვინო გავიდა.
სულ ქვეყნიდან ექსპორტზე მიმდინარე წლის იანვარ-ივლისში 38,3 მლნ ბოთლი ღვინო გავიდა, რაც 60%-ით მეტია გასული წლის ანალოგიურ პერიოდთან შედარებით.
ექსპორტზე მსოფლიოს 44 ქვეყანაში 84,3 მლნ დოლარის ღირებულების ღვინო გაიტანეს, რაც 2016 წლის იგივე პერიოდის მაჩვენებელს 52%-ით ჭარბობს.
„შვიდი თვის მდგომარეობით, ღვინის ექსპორტმა გასული წლის ანალოგიურ პერიოდთან შედარებით 60%-ით მოიმატა, 52%-ითაა გაზრდილი ღვინის რეალიზაციით მიღებული შემოსავლებიც, რაც საკმაოდ კარგი შედეგია. ქართული ღვინის გაყიდვები გაიზარდა ევროკავშირის ქვეყნებში, სამხრეთ-აღმოსავლეთ აზიის, აშშ-ს და სხვა ბაზრების მიმართულებით, რაც ღვინის ეროვნული სააგენტოსა და მეღვინეობის დარგის შეთანხმებული საქმიანობისა და ერთობლივად დაგეგმილი, სწორი მარკეტინგული ღონისძიებების შედეგია“, — განაცხადა ღვინის ეროვნული სააგენტოს თავმჯდომარე გიორგი სამანიშვილმა.
ექსპორტიორი ქვეყნების პირველი ხუთეულს შეადგენენ: რუსეთი, ჩინეთი, უკრაინა, პოლონეთი და ყაზახეთი.
აღსანიშნავია, რომ ქართული ღვინის ექსპორტი იზრდება ისეთ ქვეყნებში, როგორებიცაა: ჩინეთი — 80% (4 462 631), რუსეთი — 86% (23 740 750), უკრაინა — 41%(3 653 334), პოლონეთი — 20% (1 427 458), ლატვია — 27% (830 852), ბელარუსი — 42% (814 022), აშშ — 89% (236 012), გერმანია — 34% (234 000), ისრაელი — 202% (127 334), საფრანგეთი — 450% (95 530), აზერბაიჯანი — 170% (102 342) და სხვა.
ექსპორტზე გატანილ ღვინოებს შორის ლიდერობს „ქინძმარაული“ – 6 593 437 ბოთლი. მომდევნო ადგილებზეა:
- „მუკუზანი“ – 2 028 493,
- „წინანდალი“ – 1 468 126,
- „ახაშენი“ – 751 261,
- „ხვანჭკარა“ – 389 360,
- „ტვიში“ – 157 064,
- „ნაფარეული“ – 111 612 და სხვ.
გარდა ამისა, მსოფლიოს 17 ქვეყანაში ექსპორტირებულია 8 212 243 ბოთლი ბრენდი, რაც 91%-ით აღემატება 2016 წლის ანალოგიური პერიოდის მაჩვენებელს, და 102 402 ბოთლი ჭაჭა. ამ უკანასკნელის ექსპორტის ზრდამ 106% შეადგინა.
მთლიანობაში ღვინის, ბრენდის, ჭაჭის, ღვინომასალისა და საბრენდე სპირტის ექსპორტის შედეგად მიღებული შემოსავლები საანგარიშო პერიოდში 143,15 მლნ აშშ დოლარს შეადგენს. შესაბამისად ზრდამ 2016 წლის ანალოგიურ პერიოდთან შედარებით, 55% შეადგინა.
