„დაკავების დროს, მაგალითად, ხშირია შემთხვევები, როდესაც პირს არ განუმარტავენ საკუთარ უფლებებს, ის ვერ სარგებლობს დაცვის უფლებით, სამედიცინო შემოწმებებზე არის გარკვეული პრობლემები“, — აღნიშნა გიორგი ჩიტიძემ.
ფონდ „ღია საზოგადოება–საქართველოს" და თავისუფალი უნივერსიტეტის ორგანიზებით ორი კვლევა გამოქვეყნდა, რომლებიც ქართულ კანონმდებლობაში პირის დაკავების სტანდარტებს მიმოიხილავს და მართლმსაჯულების წინააღმდეგ მიმართულ ისეთ დანაშაულებს აანალიზებს, როგორიც არის ცრუ დასმენა, ცრუ ჩვენება და სხვა.
კვლევამ კანონმდებლობასა და პრაქტიკაში არსებული მთელი რიგი ხარვეზები გამოავლინა, რომლებიც ეხება პირის დაკავების პროცედურებს, დაკავებული პირისთვის უფლებების განმარტებას, საგამოძიებო მოქმედებების განხორციელებას, სასამართლოს და პროკურატურის მხრიდან შესაბამისი გადაწყვეტილებების დასაბუთებას, პირის სამედიცინო შემოწმებას, აღკვეთის ღონისძიების შეფარდებას და სხვა პრობლემურ საკითხებს.
