თბილისი, 28 ივლისი — Sputnik. დღეს შავი ზღვის სანაპირო ზოლზე 4-ბალიანი შტორმია მოსალოდნელი, აღნიშნულ ინფორმაციაზე შსს-ს საგანგებო სიტუაციების მართვის სააგენტომ მყისიერი რეაგირება მოახდინა და შესაბამისი ზომები მიიღო — ზღვის სანაპიროზე არსებულ ყველა საგუშაგოზე წითელი ალმებია აღმართული, იუწყება შსს-ს პრეს-სამსახური.
მაშველები ადგილობრივ მოსახლეობასა და ტურისტებს, უბედური შემთხვევების თავიდან აცილების მიზნით, მოსალოდნელი საფრთხის შესახებ რამდენიმე ენაზე აფრთხილებენ.
გარდა ამისა, შსს-ს საგანგებო სიტუაციების მართვის სააგენტო მოქალაქეებს მიმართავს თხოვნით:
- არ შევიდნენ ზღვაში მანამ, სანამ საგუშაგოებზე თეთრი ალმები არ აღიმართება;
- დაემორჩილონ მაშველთა მითითებებს;
- არ დატოვონ ბავშვები და მოზარდები მეთვალყურეობის გარეშე.
სააგენტოს ინფორმაციით, პანიკის საფუძველი არ არსებობს.
საშტორმო მდგომარეობა, სავარაუდოდ, ხვალ, დღის პირველ ნახევარშიც შენარჩუნდება.
