თბილისი, 26 ივლისი — Sputnik. საქართველოს კალათბურთის ეროვნულმა ნაკრებმა სლოვენიაში მოსამზადებელ შეკრებაზე ტესტ-მატჩში რუსეთის სტუდენტური ნაკრები დაამარცხა – 97:86, აღნიშნულია საქართველოს კალათბურთის ფედერაციის ვებ-გვერდზე გამოქვეყნებულ განცხადებაში.
გამარჯვებულთა ნაკრებში ყველაზე შედეგიანი გიორგი შერმადინი იყო, რომელმაც 18 ქულა მოაგროვა და 11 მოხსნა გააკეთა.
2015 წლის სექტემბრიდან პირველად საქართველოს ნაკრებში ითამაშა მანუჩარ მარკოიშვილმა, რომელმაც მიმდინარე სეზონი სერიოზული ტრავმის გამო გამოტოვა. თამაშის დროს მან 15 ქულა მოაგროვა – ხუთი სამქულიანი ტყორცნა განახორციელა.
ორივე გუნდი მოსამზადებელ შეკრებას სლოვენიაში გადის — ქართველი კალათბურთელები ემზადებიან ევროპის ჩემპიონატისთვის, რომელიც აგვისტოს ბოლოს იწყება, ხოლო რუსი სტუდენტები — მსოფლიო უნივერსიადისთვის, რომელიც ტაიბეიში 15-31 აგვისტოს ჩატარდება.
თავდაპირველად საქართველოს ნაკრებისა და რუსეთის სტუდენტური გუნდის ტესტ-მატჩი დაგეგმილი არ ყოფილა. მისი ჩატარების შესახებ სლოვენიაში შეთანხმდნენ.
შემდეგ ტესტ-მატჩს საქართველოს ნაკრები ავსტრიის წინააღმდეგ გამართავს, რის შემდეგაც მონაწილეობას მიიღებს ამხანაგურ ტურნირში ლიტვაში, სადაც მასპინძელი ქვეყნის გარდა ლატვიისა და პოლონეთის გუნდები ითამაშებენ.
ევრობასკეტი-2017-სთვის მზადების პირველ ეტაპს ქართველი კალათბურთელები აგვისტოს დასაწყისში დაასრულებენ.
