ოთხშაბათს აღმაშენებლის გამზირზე "ქალთა სოლიდარობის მარში" გაიმართა. იხილეთ „Sputnik-საქართველოს“ ფოტომასალაში საუკეთესო კადრები საპროტესტო აქციიდან.
ხმაურიანად ჩაიარა ძალადობის, უთანასწორობისა და ჩაგვრის წინააღმდეგ გამართულმა საპროტესტო აქციამ, რომლის ინიციატორებიც იყვნენ ფემინისტები და ქალთა უფლებების დამცველები. ასობით ადამიანმა მიიღო მონაწილეობა აღმაშენებლის გამზირზე მსვლელობაში. საპროტესტო აქციის მონაწილეებს ეჭირათ პლაკატები, იყენებდნენ სასტვენებს, მეგაფონით სკანდირებდნენ ლოზუნგებს და წვავდნენ ფაიერებს. აქციამ შემთხვევების გარეშე ჩაიარა, უსაფრთხოებას უზრუნველყოფდა პოლიცია.
აქცია შემთხვევით არ ჩატარებულა რამდენიმე დღის წინ გამართული "ქართველთა მარშის" ადგილზე. "ქალთა სოლიდარობის მარში" იყო პასუხი არა მხოლოდ "ქართველთა მარშზე", არამედ მისი რამდენიმე აქტივისტის მიერ სოციალურ ქსელებში გავრცელებულ მუქარაზე თათია დოლიძის მიმართ, რომელიც "საქართველოს უნივერსიტეტის" ლექტორი და გაეროში საქართველოს ახალგაზრდული დელეგაციის წარმომადგენელია. მუქარის მიზეზი დოლიძის მიერ "ქართველთა მარშის" და მისი ორგანიზატორების გაკრიტიკება იყო.
