თბილისი, 17 ივლისი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა საკონტროლო-გამშვებ პუნქტზე "წითელი ხიდი" (საქართველო-აზერბაიჯანის საზღვარი) დააკავეს აზერბაიჯანის მოაქალაქე, რომელიც საქართველოდან განსაკუთრებით დიდი რაოდენობით ოქროს ნაკეთობების გატანას ცდილობდა საბაჟო კონტროლის გვერდის ავლით.
გამოძიების ინფორმაციით, სამართალდამცველებმა არადეკლარირებული საიუველირო ნაკეთობები მსუბუქ ავტომობილში განთავსებული სპეციალური სამალავებიდან ამოიღეს.
ოქროს სამკაულების წონა 2,5 კილოგრამია, ღირებულება — 148 ათასი ლარი.
სისხლის სამართლის საქმე აღძრულია სსკ-ის მუხლით "საქართველოს საბაჟო საზღვარზე განსაკუთრებით დიდი ოდენობით მოძრავი ნივთის გადატანა ან გადმოტანა, ჩადენილი საბაჟო კონტროლის გვერდის ავლით", რაც ხუთიდან შვიდ წლამდე პატიმრობით ისჯება.
