რა პროდუქციაზეა მოთხოვნა კატარში და როგორ უნდა მიაწოდონ დაინტერესებულმა მეწარმეებმა ექსპორტიორებს ქართული პროდუქტი, ამის შესახებ “Sputnik–საქართველოს“ მოძრაობა KAR.GE-ს დამფუძნებელი ტარიელ ზივზივაძე ესაუბრა.
– ბატონო ტარიელ, რომელ საექსპორტო ნაწარმზეა მოთხოვნა კატარში დღეს?
— ზოგადად, კატარის ბაზარზე შესვლა ძალიან რთულია. უამრავი ისეთი პროცედურაა, რომლის ჩამოთვლაც შორს წაგვიყვანს, მაგრამ ახლა რადგან იქ საგანგებო მდგომარეობაა, ბარიერები მოხსნილია და ეძებენ ნაწარმს, რომელიც არის ხარისხიანი. ქართული პროდუქტის ხარისხი და ფასი თუ მოეწონათ, მაშინვე იყიდიან. ამჟამად არის მოთხოვნა ხილიდან: ვაშლატამაზე, ატამზე, ჟოლოზე, თუთაზე, მარწყვზე, მაყვალზე; ბოსტნეულიდან: ნედლ ხახვზე, სალათის ფოთოლზე და კომბოსტოზე; მწვანილიდან: ქინძზე, ოხრახუშზე, ნიახურზე, კამაზე, პიტნაზე. არის კიდევ სხვა პროდუქცია, რომელთაც ჩვენ ვთავაზობთ საექსპორტოდ.
– რა კრიტერიუმებს უნდა აკმაყოფილებდეს ქართული ნაწარმი?
— ბევრ სახეობაზეა საუბარი და, რა თქმა უნდა, ყველას მიმართ არსებობს კონკრეტული მოთხოვნები. ჩვენი ამოცანაა ექსპორტიორებთან დავაკავშიროთ ის მწარმოებლები, რომლებსაც აქვთ ხარისხიანი ნაწარმი, რეალისტური ფასი და დაუყონებლივ მიწოდება შეუძლიათ. ჩვენ მათ დავეხმარებით კომერციული წინადადების მომზადებაში და თუ ის სხვა ქვეყნების ანალოგიურ კონკურენტულ წინადადებებს აჯობებს, ქართულ პროდუქციას კატარში ექსპორტის დიდი შანსი აქვს.
კონკრეტულად კი პროდუქციას უნდა ჰქონდეს მაღალი ხარისხი, ფასი უნდა იყოს კონკურენტული და მიწოდება უნდა შეიძლებოდეს მნიშვნელოვანი მოცულობით.
– უკვე თუ გავიდა რომელიმე პროდუქტი საქართველოდან კატარში?
— ჩვენ დაგვიკავშირდა მეწარმე, რომელიც ეძებდა მწვანილის მიმწოდებელს და ჰყავდა დამკვეთი კატარში — ერთ-ერთი სერიოზული სავაჭრო ქსელი. ჩვენ დავეხმარეთ მას მწარმოებელთა კონტაქტების მოძიებაში და ახლა საქართველოდან დღეში საშუალოდ 1 ტონა მწვანილი იგზავნება, თუმცა გაცილებით მეტზეა მოთხოვნა, მაგრამ მეტი მწვანილი არ იკრიბება.
– ქართველი მწარმოებლები რამდენად დაინტერესდნენ ამ წინადადებით?
— დიდი ინტერესია. მაგრამ რამდენადაც დიდია ინტერესი, იმდენად დაბალია მზადყოფნის ხარისხი. შემოსული ზარების 80% და მეტი არის მათგან, ვინც, სამწუხაროდ, არ არის მზად, ან ფასი აქვს არარეალისტური, ან მიწოდება არა აქვს საკმარისი, ან ხარისხი არ უვარგა, ან ლაბორატორიული კვლევა არ აქვს, ან სერტიფიკატები არ აქვს.
ნატა პატარაია
