თბილისი, 3 ივლისი — Sputnik. მცხეთა-მთიანეთის რეგიონის გუბერნატორად ლევან ზაუტაშვილი დაინიშნა, საქართველოს პრემიერ-მინისტრმა გიორგი კვირიკაშვილმა შესაბამის განკარგულებას ხელი უკვე მოაწერა.
ზაუტაშვილმა აღნიშნულ პოსტზე გოჩა ზეიკიძე შეცვალა, რომელმაც თანამდებობა საკუთარი განცხადების საფუძველზე ივნისის შუა რიცხვებში დატოვა. ზეიკიძე მცხეთა-მთიანეთის გუბერნატორად 2016 წლის 10 მარტს დაინიშნა.
„მთავრობის განკარგულების შესაბამისად, მცხეთა-მთიანეთის ახალი გუბერნატორი მუშაობას ოფიციალურად დღეიდან შეუდგება", — ნათქვამია მთავრობის ადმინისტრაციის პრეს-სამსახურის განცხადებაში.
ლევან ზაუტაშვილი 2013-2017 წლებში იყო კომპანია „კასტელ ჯორჯიას" გენერალური დირექტორი, მუშაობდა მსოფლიო ბანკის პროექტებში. ზაუტაშვილს დამთავრებული აქვს ინდიანაპოლისის შტატის საერთაშორისო უნივერსიტეტი და ივანე ჯავახიშვილის სახელობის თბილისის სახელმწიფო უნივერსიტეტის ჟურნალისტიკის ფაკულტეტი.
