თბილისი, 17 ივნისი-Sputnik. აშშ-ს საზღვაო ფლოტის საესკადრო ნაღმოსანი USS Fitzgerald სავაჭრო გემ ACX Crystal-ს შეეჯახა, რომელიც იაპონიის ნაპირებთან ფილიპინების დროშით დაცურავდა. არიან დაშავებულები და უგზოუკვლოდ დაკარგულები, იუწყება აშშ-ს საზღვაო ფლოტის საიტი.
ინციდენტი იაპონიის ქალაქ იოკოსუკასთან ადგილობრივი დროით 02:30-ზე მოხდა.
„შვიდი სამხედრო მეზღვაურის ადგილსამყოფელი უცნობია, იაპონიის სანაპირო დაცვა მათ ძებნას აგრძელებს, ნათქვამია აშშ-ს საზღვაო ძალების პრეს-სამსახურის განცხადებაში.
ამას გარდა, ნაღმოსანიდან ევაკუირებული დაშავებულების რაოდენობა სამამდე გაიზარდა, მათ ნაკვეთი ჭრილობები და სხვადასხვა სახის დაზიანებები აღენიშნებათ.
„კაპიტან ბენსონის გარდა, კიდევ ორი მეზღვაურის სასწრაფო ევაკუაცია გახდა საჭირო აშშ-ს საზღვაო ძალების იოკოსუკას სამხედრო ჰოსპიტალში“- ნათქვამია აშშ საზღვაო ძალების მეშვიდე ფლოტის მიკრობლოგში Twitter-ზე.
ექიმების განმარტებით კაპიტან ბრიუს ბენსონის მდგომარეობა სტაბილურია.
„ამ ეტაპზე ორი პრობლემა გვაქვს, გემის შენარჩუნება და მეზღვაურების უსაფრთხოება. მადლობას ვუხდით ჩვენს იაპონელ პარტნიორებს მხარდაჭერისთვის“- განაცხადა აშშ-ს წყნარი ოკეანის ფლოტის მეთაურმა, ადმირალმა სკოტ სვიფტმა.
