თბილისი, 12 ივნისი — Sputnik. სასოფლო-სამეურნეო დანიშნულების მიწების უცხოელებზე გასხვისების აკრძალვის კონსტიტუციაში დაფიქსირება ხელისუფლების მხრიდან სწორი ნაბიჯი იქნება, მიაჩნია არასამთავრობო ორგანიზაცია „ახალგაზრდა ფინანსისტთა და ბიზნესმენთა ასოციაციის“ (აფბა) ანალიტიკოსს ბაჩანა ჯინჭარაძეს.
პრემიერ-მინისტრ გიორგი კვირიკაშვილის განცხადებით, კონსტიტუციაში გაკეთდება ჩანაწერი, რომლის მიხედვითაც, სასოფლო-სამეურნეო დანიშნულების მიწის გასხვისება არ იქნება შესაძლებელი იმ პირზე, ვისაც არ გააჩნია საქართველოს მოქალაქეობა.
ბაჩანა ჯინჭარაძის აზრით, საქართველოს ხელისუფლების ეს გადაწყვეტილება სოფლის მეურნეობის სექტორში ინვესტიციების შემოდინების შემაფერხებელი ფაქტორი არ უნდა გახდეს, რადგან თუ უცხოელებს ინვესტიციის განხორციელება სურთ, შეუძლიათ სასოფლო-სამეურნეო დანიშნულების მიწის გრძელვადიანი იჯარით აღება.
„საქსტატის" ცნობით, 2017 წლის პირველ კვარტალში პირდაპირი უცხოური ინვესტიციების მოცულობამ სოფლის მეურნეობის სექტორში ნული დოლარი შეადგინა.
