თბილისი, 4 ივნისი — Sputnik. ლონდონში მომხდარ ტერაქტთან დაკავშირებით ბრიტანულმა პოლიციამ კვირას 12 ეჭვმიტანილი დააკავა, იუწყება Sputnik International-ი სკოტლანდ-იარდზე დაყრდნობით.
„პოლიციის კონტრტერორისტული სამმართველოს წარმომადგენლებმა ამ დილით დააკავეს 12 ეჭვმიტანილი, რომელთაც ბრალი ლონდონის ხიდთან მომხდარ ინციდენტთან კავშირში ედებათ. დაკავებები განხორციელდა ლონდონის აღმოსავლეთ რაიონში — ბარკინგში ჩატარებული ოპერაციის შედეგად“, — ნათქვამია პოლიციის განცხადებაში.
სკოტლანდ-იარდი არ ასახელებს დაკავებულთა ვინაობას, მაგრამ სააგენტო Reuters-ი ადგილზე მყოფ ფოტოგრაფზე დაყრდნობით იუწყება, რომ დაკავებულთა შორის ოთხი ქალია.
„მრავალბინიანი საცხოვრებელი სახლიდან გამოიყვანეს ოთხი ქალი, მათ სახეები დაფარული ჰქონდათ. ისინი პოლიციის ორი მიკროავტობუსით წაიყვანეს“, — იუწყება სააგენტო.
შაბათს, საღამოს, ლონდონის ხიდზე მიკროავტობუსი გამვლელებს დაეჯახა, შემდეგ სამი შეიარაღებული ტერორისტი მიკროავტობუსიდან გადმოვიდა და გამვლელებს ცივი იარაღით დაესხა თავს. ტერორისტები ლიკვიდირებულია. ტერაქტის შედეგად დაიღუპა 7 ადამიანი, 48 დაჭრილია, ზოგი მძიმე მდგომარეობაშია. ტერორისტების ნეიტრალიზება პოლიციამ გამოძახების მომენტიდან რვა წუთში მოახერხა.
