თბილისი, 29 მაისი — Sputnik. შარტავას ქუჩაზე ჩატარებული სპეცოპერაციისას დაკავებულებს ბიზნესმენისგან 200 000 დოლარის გამოძალვა ედებათ ბრალად.
ყოფილი საბურთალოს ბაზრის მიმდებარე ტერიტორიაზე დაკავების სპეცოპერაცია ჩაატარეს შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს და დამნაშავეთა სამყაროს წინააღმდეგ ბრძოლის სამმართველოს თანამშრომლებმა, ნათქვამია სამინისტროს ვებ-გვერდზე გამოქვეყნებულ განცხადებაში.
თავდაპირველად სპეცოპერაციის შესახებ ინფორმაცია გაავრცელა ტელეარხ TV Pirveli-ს ჟურნალისტმა, რომელმაც Facebook-ის საკუთარ გვერდზე პირდაპირი ჩართვა გაუშვა.
შსს-ში ამტკიცებენ, რომ ბრალდებულები ფულს სძალავდნენ ერთ-ერთ ბიზნესმენს, რომელსაც მოკვლით ემუქრებოდნენ. სამართალდამცველებმა ბრალდებულები მანამდე დააკავეს, ვიდრე ბიზნესმენი მათ მოთხოვნილ თანხას გადასცემდა.
გამოძიება დიდი ოდენობით ქონების მიღების მიზნით გამოძალვის ფაქტზე მიმდინარეობს (საქართველოს სსკ-ს 181-ე მუხლის მე-2 ნაწილის "გ" ქვეპუნქტით), რაც ისჯება თავისუფლების აღკვეთით ვადით ოთხიდან შვიდ წლამდე.
