თბილისი, 22 მაისი — Sputnik. ქართველი დიზაინერების მიერ შექმნილი ტანსაცმელი „Sputnik–საქართველოს“ მკითხველთა შორის პოპულარობით არ სარგებლობს, ასეთია საინფორმაციო სააგენტოს ვებ-გვერდზე ჩატარებული გამოკითხვის შედეგები.
კითხვაზე, „ყიდულობთ თუ არა ქართველი დიზაინერების მიერ შექმნილ ტანსაცმელსა და ფეხსაცმელს“, გამოკითხვაში მონაწილეთა უმეტესობამ (46,2%) უარყოფითი პასუხი გასცა.
ხოლო რესპონდენტების 42,3%-ს სურვილი კი აქვს შეძენის, მაგრამ თვლის, რომ ქართველი დიზაინერების მიერ შეკერილი ნაწარმი ძვირია. აღნიშნულ კითხვაზე დადებითი პასუხი მხოლოდ 11,5%-მა გასცა.
ქართველი დიზაინერები სულ უფრო დიდი პოპულარობით სარგებლობენ უცხოეთში. მათი ნაწილი მუშაობს როგორც მაღალი შემოსავლის მქონე, ისე საშუალო შემოსავლის მქონე კლიენტებზე. თუმცა, როგორც აღმოჩნდა, ქვეყნის მოსახლეობის უმეტესობისთვის ქართველი დიზაინერების მიერ შექმნილი ტანსაცმელი, მაღალი ფასიდან გამომდინარე, მიუწვდომელია.
ხშირად ქართველი დიზაინერები კოლექციებს ქმნიან იმისთვის, რათა საკუთარი პროდუქცია რუსულ, ევროპულ და ამერიკულ ბაზარზე გაიტანონ.
