თბილისი, 13 მაისი — Sputnik. წყვილები რომლებსაც საქართველოს დამოუკიდებლობის დღეს აქვთ დაგეგმილი ქორწინების გაფორმება, ახალი დიზაინის მოწმობას მიიღებენ.
შესაბამის ბრძანებას უკვე მოაწერა ხელი იუსტიციის მინისტრის მოვალეობის შემსრულებელმა ალექსანდრე ბარამიძემ.
ბრძანების თანახმად, დოკუმენტის წინა მხარეს, ოქროსფერ ჩარჩოში ჩაიწერება აფორიზმი შოთა რუსთაველის „ვეფხისტყაოსნიდან“:
„ლეკვი ლომისა სწორია, ძუ იყოს, თუნდა ხვადია“.
მოწმობის ყდის პირველ გვერდზე ასევე დატანილი იქნება წარწერები: „მე რუსთაველის ქვეყნიდან ვარ!“ და მის ქვემოთ: „ქორწინება დარეგისტრირდა საქართველოს დამოუკიდებლობის დღეს“.
მოწმობის ყდის მარჯვენა ქვედა კუთხეში სპეციალური ორნამენტი იქნება გამოსახული.
დოკუმენტის მეორე და მესამე გვერდები ცარიელი იქნება, ხოლო მეოთხე ასევე შემოსაზღვრული იქნება ოქროსფერი ჩარჩოთი.
