თბილისი, 4 მაისი — Sputnik. საქართველოს განათლებისა და მეცნიერების მინისტრმა ალექსანდრე ჯეჯელავამ სკოლის მოსწავლეთა ჯანსაღი კვების აუცილებლობის შესახებ ისაუბრა.
საქართველოს სკოლის ბუფეტებში აიკრძალა ჩიფსების, ორცხობილების, შოკოლადის, კანფეტის და გაზიანი სასმელების გაყიდვა. ამასთან ერთად განათლების სამინისტრო სოფლის მეურნეობისა და ჯანდაცვის სამინისტროებთან აქტიურად თანამშრომლობს სკოლების სასარგებლო კვების პროდუქტებით მომარაგების კუთხით.
"ეს იქნება ჯანსაღი პროდუქტი, ბოსტნეული, ხილი. უნდა შევეცადოთ. შვედეთში იყო პროექტი, რომ სოფლის მეურნეობამ დაიწყო პროექტი და ყველა სკოლის შესასვლელში დადგა ვედრო/თასი ვაშლით. თუ არ გინდა, ნუ შეჭამ. ჩემი ოცნებაა, რომ ყველა სკოლის შესასვლელში ვაშლიანი თასი იდგეს. ნუ შეჭამს, თუ არ უნდა, ბოლოს მაინც შეჭამს, ესუსნავებათ ბავშვებს და მიადგებიან იმ ვაშლს და შეჭამენ", – განაცხადა ალექსანდრე ჯეჯელავამ საზოგადოებრივი მაუწყებლის პირველი არხის ეთერით.
მინისტრმა ასევე ამ პროცესში მშობლების ჩართვის მნიშვნელობა აღნიშნა. ჯეჯელავა დარწმუნებულია, რომ ჯანსაღი კვება სკოლის მოსწავლეებს სასწავლო პროცესზე კონცენტრირებაში დაეხმარება და სკოლის მასალის ათვისებას შეუწყობს ხელს.
